فيديو.. رضوى الشربيني تعلن على الهواء توقف برنامجها “هي وبس”

المستقلة/ منى شعلان/ أعلنت الإعلامية المصرية رضوى الشربيني، توقف برنامجها “هي وبس”، والذي يعرض على قناة CBC سفرة، موضحة أن السبب وراء ذلك هو احتياج ابنتيها إليها، مشيرة إلى إن فترة غيابها مؤقتة ولن تطول.

وقالت “الشربيني” خلال حلقتها أمس من برنامجها “هى وبس”: “أنا عارفة إن أنا أول مرة أعمل الحركة دي في أي موسم قعدنا أربعة مواسم ماعملتهاش، أنا بستأذنكم إن أنا أطلع إجازة وإن شاء الله مش هتبقى إجازة طويلة، هحاول على قد ما أقدر، أنا عارفة أنكم أتعودتم إن كل المواسم بتكون بالشهور الكتير دون فاصل في النصف”.

وتابعت: “لكن في الحقيقة أنا بناتي زعلانين مني جدًا وهما قاعدين وراء الكاميرا دلوقتي، فعايزة أكون معاهم شوية، كمان الموسم دا أصعب موسم في الخمسة والحلقات تقيلة وكل حاجة تقيلة وأنا كنت عايزة آخد الإجازة من بدري، وكنا بدأنا الموسم من قريب، فمهنيًا، ما ينفعش وكنا متفقين مع ناس، ولقيت التوقيت المناسب رأس السنة، أنتم بتحتفلوا وأنا كما أحتفل مع بناتي حبايبي وأمي واللي حواليا، وآخد إجازة”.

وأضافت: “أنا بعتذر وعارفة أنكم بتستنوا البرنامج بس عايزاكم تعذروني وأنا بحبكم جدًا جدًا، مش هكون معاكم لأول مرة في رأس السنة، خليني أقولكم 2020 كانت كرم وستر في كل الأحوال لكن سنة تقيلة علينا جميعًا ومكناش مستعدين حتى نفسيًا ليها، عليكي بالدعاء والإلحاح، أي مصيبة وقعنا أو هنقع فيها ماحدش هينجدنا إلا ربنا، خلي عندك ثقة في الله سبحانه وتعالى، وتفاءلوا بالخير تجدوه، وخلي بالك على روحك وأشوفك على خير”.

من ناحية أخرى ، نفت الإعلامية رضوي الشربيني، شائعة زواجها سرا من سمير يوسف المدير التنفيذي لقنوات (cbc) زوج الإعلامية الشهيرة منى الشاذلي.

وأكدت رضوي الشربيني خلال “لايف” عبر حسابها الشخصي بموقع التواصل الاجتماعي “فيس بوك”، وقالت: “الحقيقة أن أنا بقالي خمس سنين في برنامج “هي وبس”، وبيتقال عليه كلام كتير أوي وبيطلع عليه إشاعات مرة ناس جوزتني 13 مرة، وأرقام غريبة ومرة من فلان”.

وتابعت: “الحقيقة أن بقالي خمس سنين ونص بسمع كلام مش محترم وغلط ،وبيطلع عليه إشاعة كل اسبوع أو شهر، وكل الي اتقال عليه خلال خمس سنين كنت مش بعلق ولا بتكلم مهما حصل ومهما اتقال لكن خلاص”.

وأردفت: “كنت مش بتكلم لأن طول الوقت بقول أن ربنا موجود وهيبن الحقيقة واللي عايز يحبي أهلا وسهلا واللي مش عايز هو حر، ولكن أنا اتفأجات بإشاعة غريبة جدا وكلام مش عارفة اتقال لية، والإشاعة دي مش تخصني أنا لوحدي وعشان كده طلعت أتكلم”.

وأضافت: “عايز أقول لكل الناس اللي بتحبني أو مش بتحبني أنا مش مرتبطة ولما هرتبط كل الناس هتعرف عشان أنا مش الست اللي بتعمل حاجة في الخفاء ، والجواز مش حرام ومش عيب بس أنا لا أقبل اتجوز راجل متجوز ولا أحب اكون ضرة وفي ستات تقبل بس أنا مش عايزة”.